Опис на Програмата

Центарот за развој на Вардарскиот плански регион објавува повик за аплицирање во старт-ап програма во рамки на Inno Ecosystem проектот.

Програмата е намената да поддржува тимови со иновативни идеи во рана фаза од развојот на идејата од областа на туризмот. Сите заинтересирани тимови кои работат на развој на некаква идеја, апликација, платформа или веќе имаат некакво решение во фаза на прототип може да се пријават во старт-ап програмата.

Регион

Програмата поддржува развој на иновативни решенија во индустријата за патување, туризам и угостителство во Вардарскиот регион

Програмата обезбедува:

• бесплатни менторски и тренинг услуги за дефинирање на бизнис модели
• можност за вмрежување
• презентација на бизнис идеите пред потенцијални инвеститори

ПОВИКОТ Е ОТВОРЕН ДО 20 август 2003

Сите заинтересирани може да аплицираат на следниот линк: СТАРТ-АП ПРОГРАМА

Што добивате?

Главната цел на старт-ап програмата за туризам е да го промовира развојот на иновативни решенија во индустријата за патување, туризам и угостителство во Вардарскиот регион.

Учесниците во оваа програма ќе добијат:

• бесплатна обука за Design Thinking и сертификат за истата (пазарната вредност на обуката е 1.000 евра)
• бесплатно менторство од еминентни, домашни и интернационални професионалци на 48-часовен хакатон
• пристап до инвеститори – презентација на бизнис идеите пред потенцијални инвеститори – инвестициски networking event
• простор за дискусија за трендовите и идните перспективи на тема туризам на специјално организирана Тркалезна маса
• и, се разбира, многу нови контакти и одлична забава

Кој може да аплицира?

Програмата е намената да поддржува тимови со иновативни идеи во развојна фаза. Сите заинтересирани тимови кои работат на развој на некаква идеја, апликација или решение за одреден проблем во областа на туризмот може да се пријават во програмата.

Програмата не поддржува идеи на индивидуалци. Идејата треба да биде преставена од тим најмалку од двајца членови.

Услови за учество:

Во Програмата можат да учествуваат исклучиво тимови составени од минимум 2 и максимум 5 члена.

• идеите и концептите кои ќе бидат доставени треба да се во областа на туризмот во рамките на предложените теми и пошироко
• предложените бизнис решенија да се однесуваат на Вардарски регион
• решението може да се надоврзе на постоечки производ, но тимот мора да покаже дека го развива и за време на хакатонот
• возраст на учесниците: нема ограничувања

За учество во програмата ќе бидат селектирани максимум 20 учесници (членови на тимови).

Само селектираните тимови може да се натпреваруваат на хакатонот.

Учесниците кои ќе бидат избрани, ќе потпишат изјава со која ќе се обврзат активно да учествуваат во целокупната старт-ап програма: пет-дневна обука за Design Thinking (прв чекор за тестирање на бизнис идеја) и хакатонот (развивање и тестирање на бизнис модели).

Предлог теми / предизвици кои треба да ги адресира бизнис идеја со која се аплицира (листата не е конечна и ограничувачка)

• иновативни туристички решенија кои промовираат одржливост и позитивно влијаат на локалните заедници
  • „паметни“ дестинации и „паметна“ мобилност
  • рурален развој
  • угостителство
  • софтверски и технолошки туристички решенија

Критериуми за избор на идеја

• иновативност и креативност на решението
• разбирање на опишаниот проблем
• компатибилност на тимот

Временска рамка на реализација на старт-ап програмата

Старт-ап програмата ќе се реализира во месец септември во Велес.

20 јули – 20 август: Отворен повик за учество во старт-ап програмата за развој на бизнис идеи во областа на туризмот.

Повикот е објавен на 20.07.2023 година.

Аплицирањето ќе се одвива исклучиво по електронски пат, со пополнување на апликацијата на следниот линк СТАРТ-АП ПРОГРАМА

Апликантите ќе бидат известени за статусот на апликација на почетокот не месец септември 2023.

11 – 15 септември 2023: тренинг обука за Design Thinking (10 до 16 часот)

Оваа тренинг обука се заснова врз Design Thinking методологија прилагодена за старт-ап бизниси.

Преку петте фази од тренинг обуката, учесниците ќе бидат водени низ процес на потврдување на бизнис идеите и создавање на остварлив старт-ап. За време на тренингот учесниците ќе работат на: наоѓање, валидација и стекнување на клиенти, како и развивање на нивниот тим и тимското работење, комуникација и други вештини.

На крајот, на секој учесник што успешно и редовно ќе помине низ обуката, ќе добие „Design Thinking Certificate for Startup Innovation“.

21 – 23 септември: 48-часовен Хакатон

Хакатонот ќе ги поврзе учесниците со еминентни ментори за туризам со цел да ги доразвијат своите идеи / производи / услуги за туризам, патувања и угостителство и да откријат нови технологии.

Избраните учесници на хакатонот ќе поминат 48 часа во потврдување на нивните идеи, вмрежување, и ќе бидат менторирани од професионалци од индустријата. На крајот, ќе имаат можност своите идеи и решенија да ги презентираат пред панел од потенцијални инвеститори, директори на компании и претприемачи.

Старт ап програмата: Туристички иновации во Вардарскиот регион е организирана од Центар за развој на Вардарски плански регион во рамките на проектот “Креирање иновативен екосистем за поддршка на можностите за вработување на ИТ млади таленти во прекуграничниот регион” (INNO-ECOSYSTEM). Проектот INNO – ECOSYSTEM е кофинансиран од Европската унија и од националните фондови на земјите учеснички