Во рамки на процесот на изработка на Стратегијата за развој на Вардарскиот плански регион за периодот 2027–2031 година, експертот за локална самоуправа Антонио Караланов, директорот на Центарот за развој на Вардарскиот плански регион Зоран Јаневски и вработените во Центарот одржаа средба со претставници на граѓанските организации кои дејствуваат на територијата на деветте општини во регионот.
Средбата беше посветена на размена на мислења, идентификување на потребите на граѓанскиот сектор и прибирање предлози кои ќе придонесат за креирање на развојни приоритети и мерки во новата регионална стратегија.
Претставниците на граѓанските организации изнесоа бројни предлози и идеи во повеќе области од значење за локалниот и регионалниот развој, меѓу кои социјалната заштита, цивилната безбедност, младинското учество, како и унапредувањето на соработката помеѓу граѓанскиот сектор, општините и институциите.
Посебен акцент беше ставен на потребата од поголемо вклучување на граѓанските организации во процесите на планирање и донесување одлуки, препознавање на потребите на различните категории граѓани и создавање услови за поефикасно решавање на предизвиците со кои се соочуваат локалните заедници.
Предлозите и препораките изнесени на средбата ќе претставуваат значаен придонес во процесот на подготовка на новата Стратегија, со цел таа да ги одразува реалните потреби на населението и развојните потенцијали на сите девет општини во Вардарскиот плански регион.
Вклучувањето на граѓанскиот сектор е важен предуслов за создавање инклузивна, одржлива и долгорочна регионална развојна политика, заснована на партнерство, меѓусекторска соработка и активно учество на сите релевантни чинители.
No comment yet, add your voice below!